Bongou a envie d'entendre les artistes réunionnais s'exprimer en toute liberté sur les événements présents. Sully Andoche, auteur et rakontèr zistwar à ses heures ne s'est pas rué dans notre collimateur. Cependant, en toute humilité, il a accepté de causer. Et nous sommes fiers de publier.
La di amwin anvoy in kozman dési sak i éspas sétansi. Mi sipoz sé pou konèt santiman in lartis. Soman, mi fout koné minm pa si mi lé in lartis po vréman. Mé konm mwin la di wi, ma sèy larg inndé ti mo parapor sak mi koné.
Mwin té péyé konm édikatèr pandan 40tan. Zot i mazine inpé mon laz, é tousa k'mwin la vi dann 40tan-la ! Lèr mwin la arèt travayé, mwin té ragoulé. Akoz ? Akoz mi koné pa si mon travay la ansèrv kétsoz. Lo zour mon rotrèt, mwin la rapèl in tralé mové souvnir.
In momon i di son zanfan «Out lédikatèr na rézon : arèt volé mounwar !... Si ankor ou té anminn (sak ou la volé) la kaz ! »
Inn gran fi i di : « papa i travay somèr »
Inn ti garson sinkan i promèt in zour li va alé la prizon pou rèt koté son papa.
In momon i di li giny pa ni randévou èk son marmay li la pokor vi dopi in mwa, akoz zordi li sar trap kado fèt dé mèr la méri...
Mi pé fourni azot in vwayaz kozman konmsa.
Sak fwa mwin té di :
Saminm mon Rényon ?
Mwin stin moun konm in not, é mwin té anvé bann paran-la a mor, akoz soufrans zot té fé viv zot zanfan ké la pa domann tousala. Somansa, vitman, mwin té di : na in nafèr i déroz, néna kéksoz i tourn pa ron pou kin paran i fé ankès son zanfan in nafèr parèy.
Poukwé mi débit èk in kozman mol parèy sa ? Pars mi vé nou réflési dési in fraz mi antan bonpé sétansi : la violans i sèrv pa riyin !
A bin, kisa i pé di lo kontrèr ? Zot i krwa mwin lé kontan war mon gayar ti péyi tonm an dégrénant, ousa mon vyé momon i giny pi somèy afors mové nouvèl la radio ?
Mé kèl violans nou koz la ? Violans grénad péyi dési kasanfèr ? Violans dégrénaz la boutik nout kartyé ? Violans dofé dann poubèl ? Violans bazardyé i koné pi tomat ?
É violans la pi kontra po ou ? Violans koli alimantèr ? Violans 7 di mwa, la ké si trotwar, dovan gabyé la post, trap in katsou la mizèr i ansifi pa pou évit bwat pilsar an kari fin di mwa ? Violans « fé pa lèv papa kan ou sar lékol. Li la rant sou yéroswar, son patron la di ali vyin pi domin » ?
Épila violans désèrtin moun la promèt zordi, la disparèt domin ? Violans sak i éstim zot pos lé pa asé plin, é ki vot in lwa pou aranz dézagréman-la...
Kozman politikèr, sa konm paké brèd sousou :
kan la fine triyé, na plis pou zété ké pou manzé.
Mi mèt pa tout dann minm vagon, mé lo trwakar, i fo zot i révèy in kou, la. Kwé i kout azot alé dovan la port domoun, pou konprann akoz la vi tou lé zour lé èg an bilinbi ? Zot i pé pa ? A wè ? Afèr zot i pé kan néna zéléksyon ? Mé non, pou zot, tout lé dos, la pwin problinm dans le pays du vivre ensemble. In-in, zot i tronp la :
Viv akoté lé pa viv ansanm !
Mi koné zot lé pa kapab géri tout boubou nout péyi, mé zot i pé pa maziné kèl soulazman d'kèr pou in moun dann malizé, trouv an vizavi, in moun dé byin i akout ali, i konpran ali, é saspé boudikont, i rosanm ali !
Anparlan, zot té kontéstatèr fitintan, non ? Alor, kan lé anlèr i kontès pi ?
Mé kwék payanké i koné si malèr vèrdtèr ?
Épila, bav ! Bèzman i pèt, tout i anflam, mondyé sényèr, rod ranfor, couvre feu, jugement en comparution immédiate !
Normal, fo asir la sékirité, é mon vyé momon i romèrsyé azot. Mé ousa nou sava la ?
Prison de Domenjod : le quartier des arrivants déborde déjà, zournal la di.
Saminm mon Rényon ?
Alé zonm èk fanm désidèr nout nasyon, fé in manir souplé ! Mwin lé sir zot lé pa kontan war lavnir an kit-tamèr nou rof nout marmay ! Mi anfou pa mal larzan zot i tous, mé dékarki azot pou mérit sa foutor ! Mi ansipli azot, fé tout zot posib pou k'nou arèt fabrik zanfan pou lésportasyon. Pou k'le service mobilité du CNARM i tonm an fayit. Pou k'bivèt la boutik an ronm sarèt saviré i krèv la swaf. Pou k'dosou léskalyé limèb i ansèrv pi konm garaz pou moto dézosé...
Épi ansanm, anon domann anou akoz in sèrtin katégori kréol i vyin pa rényon paran délèv, i frékant pa médiatèk, i sar pa vakans santaéré malgré lé 1€, i mèt pa lo pyé dann téat, i krwa la plaz boukan la pa pou zot, i pil si lo vant zot kamarad pou trap in tablèt an promosyon...
Bon, méton, paran na zot résponsanilité, politikèr na zot résponsabilité. Astèr, anou ké na la parol otroman ké dann in radio konfésional, kwé nou fé nou ? Kwé nou kab mèt an plas pou, kansréti, adousi la soufrans nout zénés ?
Mwin minm, i fo mi kalkil kèl kapasité i rèt amwin ankor malgré mon laz sové blan, pou donn in koudmin mon péyi mi yinm tro, é mi vé pa war koul an bato fou.
In, bann kazak zone, mwin la pa tro koz si zot mouvman, mé ala inn ti provèrb pou zot :
Si moustik té pik pa, ou noré nyor son non.
Wala, éskizé si mon kozé té pa tro artistik.
Alé, nou artrouv... ziska in not Rényon !
Sully Andoche